സന്താന സൗഭാഗ്യം

ഒരച്ചൻ പുത്തനാട്ട് പള്ളിയിൽ വികാരിയായി വന്നു. പള്ളിക്കടുത്തുള്ള ഒരു വീട്ടിൽ 30 ഉം 28 ഉം വയസ്സുള്ള ദമ്പതികൾ ഐശ്വര്യത്തോടെ  ജീവിക്കുന്നു. എന്നാൽ, കല്യാണം കഴിച്ച് അഞ്ചു വർഷം കഴിഞ്ഞിട്ടും അവർക്ക് കുട്ടികളുണ്ടായിരുന്നില്ല.
അച്ചൻ അവരോട് പറഞ്ഞു: ഗൃഹനാഥൻ ഫ്രാൻസിലെ ലൂർദ്ദിൽ പോയി അവിടെയുള്ള മാതാവിന്റെ രൂപത്തിനു മുമ്പിൽ തിരി കത്തിച്ചാൽ ദൈവം നിങ്ങൾക്ക് കുഞ്ഞുങ്ങളെ തരും.

അന്നത്തെ 25,000 രൂപ ചെലവാക്കി അയാൾ ലൂർദ്ദിൽ ചെന്ന് തിരി കത്തിച്ചു. പോയി തിരിച്ചു വരാൻ രണ്ടാഴ്ച സമയമെടുത്തു. ഇതിനിടയിൽ അച്ചൻ ഉത്തരേന്ത്യയിലേക്ക് ട്രാൻസ്ഫറായി. പത്തു വർഷം കഴിഞ്ഞ് അച്ചൻ വീണ്ടും ആ പള്ളിയിൽ വികാരിയായി തിരിച്ചെത്തി. അപ്പോഴാണ് പണ്ട് തിരി കത്തിക്കാൻ പോയ വീട്ടുകാരെ ഓർത്തത്. വിവരമറിയാൻ വേണ്ടി അച്ചൻ ആ വീട്ടിൽ ചെന്നു. ഒമ്പതും ഏഴും അഞ്ചും മൂന്നും ഒന്നും വയസ്സുള്ള കുട്ടികൾ വീട്ടുമുറ്റത്ത് ഓടിക്കളിക്കുന്നു. ഭാര്യ മെലിഞ്ഞൊട്ടിയിട്ടുണ്ട്. ആകെ പട്ടിണിയും പരിവട്ടവും. അച്ചൻ ഭർത്താവിനെ അന്വേഷിച്ചു.  

ഭാര്യ പറഞ്ഞു: അച്ചാ, ബ്ലേഡുകാരന്റെ കയ്യിൽ നിന്ന് അമ്പതിനായിരം കടം വാങ്ങി അദ്ദേഹം ലൂർദ്ദിലേക്ക് പോയിരിക്കകയാണ്.

അച്ചൻ: ഇപ്പോഴെന്തിനാ ലൂർദ്ദിൽ പോയത്?

ഭാര്യ: പണ്ട് കത്തിച്ച തിരി കെടുത്താൻ പോയിരിക്കയാണച്ചോ.